نصائح للراغبين في الزواج

الحاجات دي للعريس

• أختار عروسة مابتعرفشى تقرا ولا تكتب ابتدائية قديمة محو امية أوعى تكون فاكرنى بهزر –صدقنى ده الأختيار المثالى لهذا الزمان- يعنى مافيش انترنت ولا شات ولا كاميرا ومايك وماسنجر ولا بحث ولا رسائل فى القنوات الفضائية ومش حتقعد تفتش فى محمولك كل شوية مين الرقم دة؟؟ وايه الرسالة دى ؟؟ وايه كارت الميمورى اللى انت مخبيه ده؟؟؟ انا عاوز لك حاجة تريحك فابريقة مصنع يعنى لا استعمال الخارج ولا استعمال دكتورة ولا نازللها سوفت وير حتقوللى مش حتفهمنى حقولك بالعكس دى اسرع واحدة حتفهمك قال يعنى حتفهم اينشتين حتقوللى مش حتعرف تربى الولاد حأقولك هيا فى كل الأحوال مش حتعرف قال يعنى انت حتعرف؟؟ وللا تكون فاكر نفسك حتعرف ؟؟ البركة فى أهلك وأهلها و التليفزيون و المدرسين وبعدين انت شاغل دماغك بالعيال ليه دلوقتى احنا فين والعيال فين ؟؟ خلينا فى المصيبة اللى انت رايحلها برجليك الأول

• الوزن – 50 كجم الحد الأقصى انا عارفك طفس بتحبها طويلة بيضاء رشيقة كل ده مش مهم كلها سنة واحدة بعد الجواز وكله حيبقى شبه كله اسود (حينسوا كريم فير اند لفلى ) وتخيين (انت ونصيبك وكل واحد على قد نيته) وقصير ( صدقنى حتى الطوال بعد الجواز بيقصروا حاجة ربانى يعنى) ولو مش مصدقنى اسأل اى حد متجوز بص له بس انت حتعرفه على طول حتلاقيه ماشى موطى فى الأرض و دمعة فى عينيه اديله منديل وخد رأيه وانا متأكد انه حينصحك : هات لفتين ثلاثة عشرين ثلاثين بكرة مناديل أكيد حتحتاجهم وكنتى فين يا لأ لما قلت انا آه – أوعى تعيط جنبه دورك فى العياط لسه ما جاش –

• دقق قوى فى عيلتها واتأكد ان ما فيش واحد محامى يكون قاريبها –جارها- صاحب أخوها أحسن ولا مؤأخذة حتبقى فضيحتك بجلاجل وتلاقى نفسك مع أول مشكلة : مخلوع وتلاقى الناس فى الشارع بيشاوروا عليك وبيضحكوا وتلاقى ولادك بيتشتموا ويتقال لهم يا ولاد المخلوع

• أبوها مهم جدا أبوها نصيحتى بلاش يكون موظف –قاعد فى البيت ليل نهار- والعملية مش ناقصة وطبعا بلاش رجال الأعمال انت مش ناقص اللى عنيهم زايغة على السكرتيرات واموال البنوك واوعى تفكر فى اللى مسافر بره حتبقى قرابيزك كلها مع حماتك –يا عينى عليك – وبلاش السباك والحانوتى والجزار والفرارجى - انت مش ناقص انفلونزا الطيور- وبلاش كمان يكون اعمال حرة او صاحب محل مباحث التموين مش سايبه حد فى حاله وبعدين انت حتخطب وللا حتجرى ورا ابوها فى الأقسام ؟؟؟
العروسه بقي ربنا يكون في عونها ساعه الاختيار